NGKHU

Motto: “Nupui hmu chuan thil tha a hmu a ni"

Director of Editor: Pu Mapuia
Chief of Editor: Pu Zopara

King of Editor: Pu Valtea
Editor of Editor: Pu Johny-a
Emperor of Editor: Pu Laikunga
Architect of Editor: Pu Nghaktea
President of EditoR: Pu Achhuana


MONEITU CHANCHIN

Vawiina a changtupa Lalhunruata hi September ni 4, 1977 khan Pu Khualluna Pautu leh Pi Hrangchhungi-te fa 4 zinga a upa ber dawttu ni turin Durtlang Presbyterian Hospital-ah he khawvel eng hi mi te tih thin dan angin tap chungin a rawn hmu tan ve a. Amah hi tet te atanga seilian niin, thangkhat lian tak zet tlangval hun a hman hnuah vawiin atang chuan Pasal dinhmunah a in hlang kai ve ta, nakinah phei chuan ‘A pa’ chu mi hnu leh ah ‘A pu’ ni ve ngei tawh turah kan ngai.Huna hi tlangval invawngfel thlip thlep, thil ngaihtuah chik peih tak, tawng chher chhuai chhuai thei khawpa a tul huna tawng thin, fing tak a ni.

Kohhran leh khawtlangah hian sulhnu ruahthamloh a lo hnutchhiah ve nual tawh a, tunah hian KTP Branch Committee Member niin, Abrahama Group Assistant Leader ni lai, Refreshment Sub-Committee Chairman ni bawk a ni. Bial Zaipawlah phei chuan (Awi ka rei!!) hetiang hian sawi ta ila kan hrethiam awm e, a hun laiin Pastor Pali a hrawn hman!!! Beginner Department ah Zirtirtu a ni a, hei hi a training ground tha ber a ni. Chaltlang North Branch YMA ah hian ECM leh Cultural Sub-Committee Secretary ni lai a ni. Tin, Lily Veng Cultural & Drama Club-ah hian a dintu leh a hnarkaitu ber a ni a, tunah hian Vice President ni lai a ni.

Nitina Pisa kai nan State Guest House a hmang thin a, Sap Pachal leh Nula tituai nalh tak tak pawh hi hmaichhanah a hmu fo thin, mahse a uang ve ngai lo. Football hi a khelh a tuipui ang zetin a sawi pawh a tuipui a, a hnuhnung zawk hi a thiam zawk mah.


MO CHANCHIN

A Chunnu leh Zuapa ten Zo-i/Zote tia an koh, Zokailiani hi September ni 30, 1978 khan Hlimen khuaah Pu R.Zohmingthanga leh Pi Tlangkhumi te fa 4 zinga a pathumna ni turin he khawvel hi a rawn barakhaih ve ta thut mai a. A ni pawh hi Huna ang tho in a tet te atanga seilian ve tho a ni a, nupui ni tur hian a inbuatsaihna a rei thawkhat ve tawh hle a ni. ‘A Nu’, ‘A Pi’ nakin lawka an ni tur hi amah pawhin mak a la ti ve ang. Zo-i hi nula fel leh zuan zang tak, khawtlang leh Kohhran tana mi tangkai tak a ni a. A hmaa tih tur awmte hlenchhuah tum tlat mi a ni. Amah hi nula ngawichawi tak nimahse fiamthu duh leh nuih peih tak a ni a, amah hrechiang apiangin a bula awm nuam an tiin an zawng chhang thei hle.
Hlimen Branch KTP-ah Treasurer chanvo chelh lai a ni a, Naupang lam Sunday School-ah Senior Department Zirtirtu ni lai mek a ni.BSI Collector, Masihi Sangati C/M ah te a phak ang tawk tawk a inhmangin, an Kohhran nula chhuanvawr ber te zinga mi a ni. Bial Zaipawlah pawh kum 2006 vel atang khan a Contralto part tun thlengin a la sa ve ngar ngar a ni. An sawi dan takah phei chuan ‘U Zo-i a zai hlarh hlarh tawh hi chuan Sunhlu hnah te pawh hi an til er er zel’ an ti.
Kut themthiam tak pawh niin hriat a ni a, Kut hnathawh lam hi nuam a tiin a taima hle a ni. Infiamna lam hi a tuipui ve khawp mai a, ‘inhawngbi’ ‘inbihruksiak’ ‘Burchhe thin rik’-ah te phei chuan an veng chhuanvawr ber a ni.


MONEITU THIAN CHANCHIN

Vawiina a changtupa bula Mizo Pa dik tak ding tai mai hi Pu Laikunga Ralte a ni a, tunah hian nupui fanau neiin Lily Vengah an khawsa mek a, Sakawrtuichhun lamah hian Rockstar ho nen an rock thin.
Kohhran leh khawtlangah mi tangkai tak a ni a, tunah hian Sunday School-ah Junior Department Zirtirtu a ni a, KTP lamah Branch Committee Member niin Jakoba Group Asst.Leader a ni mek bawk. Ani pawh hi Sport lama a thlen san ber tum chu an vawk chhuak a um kha a ni mai awm e. ‘Ih e maw’ a tih pawn ‘e’ lo tih ve mai tur a ni. Thil chhut ngai reng reng chu ‘A cubic’ zawngin a hre vek!!!

MO THIAN CHANCHIN

Mo bula no tak maia lo thle no hnap mai hi Mimi Zohmingmawii a ni a, tun thlengin nula a la ni. Hlimen hi a tualchaina a ni a, Kohhran leh khawtlangah mi inhmang tak a ni, mi ngawichawi leh mi invawngfel tak a ni. Tunah hian F.Thangmawia School, Melthum-ah Zirtirtu hna thawkin a buai thei hle a, naupang chhawnchhaih pawh a hneh hle. Ani hi a duh apiang te tan chuan...sava thlawk lai, la kah thlak loh ang a ni. Tunah hian Kohhran leh thalai rawngbawlnaah mi tangkai tak niin Branch KTP Committee Member, Bial Zaipawl Soprano part sa hlerh hlerh thin a ni. Infiamna lamah chuan invawr a thiam hle.

A TIRIN (In the Beginning......)

A tirin Pathian in lei leh van a siam a, chhan neiin a ni a siam ni. Tichuan Mihring te pawh a siam zel a, chhan neiin a ni a siam ni. A short cut zawng in tun hi kan lo thleng ta a, chhan neiin a ni kan sawi ni.
KTP General Conference hi vawi duailo neih a lo ni tawh a, hemite ang em em a hmang tangkai hi chu an vang ngawt ang em aw kan ti. A ruh langin kan han puan ang e. Kumin March ni 3 khan Mamit lam panin Zoram dung leh vanga KTP member a sing tel teh meuh chu General Conference hmang turin kan kal khawm a, kan in pel suau suau a, hmuhnawm ti takin kan inthlir liam vawng vawng a, vei zui ut ut pawh kan nei hmanlo, chu chu a tam zawk te kalkhawm awm dan a ni. Mahse...mahse.. ‘Pathian thil rel dan hi a va mak em’ tih zawng zawng kha kan lo chang ta. Pu Zahlira in ah chuan mi 200 dawn teh meuh mai an thleng khawm a, mikhual leh khual lo pawh thliar hran har khawpin an zi nuai nuai a, nula fel deuh ho chuan eirawngbawl leh a tul apiang te chu an thawk sang sang a, chung zingah chuan Zo-i pawh hi a tel ve ngei a. Chutia nula ho han che sang sang chu Huna chuan ‘Khawnge hei zet chu’ tih tur an awm em aw tiin zing thingpui in pah chuan kil khat atang hian chik fahran hian a lo en kual vel a. ‘Aih, hei chu ni lo, next...’ a lo ti rilru zut zut a, tum dang ang bawka a lo tih thin dan angin a duhzawng a hmulo leh dawn a ang hman hle. Tichuan, tlem a thuthmun siam remin, a khabe te chu an chhawng hniam deuh a, kilkhatah hian nula pakhat hian zawngtah hi a lo ziat mawlh mawlh mai a, a hnung chhawn si a, mahse a bahsam leng siau siau chuan mawi dan dang nei tlat hian hriatna a nei a, belh chian a chakna chuan a thinlung chhungril a a huaisenna a sawmkhawm ngam ngailoh chu a tilang lui ta a, dinglamah pen thum a pen a, 45o velin a lu an her a, chutih lai tak chuan mipakhat hian ‘Zo’ a rawn ti zauh a, chu nula chu a rawn hawi chhuak zawk a. Chulai tak scene chu kan sawi thiamlo, tek hi a rawn de chuai chuai ni berin Huna hian a sawi, Zo-i phei chuan ‘Kha tihlai tak khan keimah ka inrintawkna zawng zawng a bo vek a, Lalpa ka lawm e’ ka ti ringawt a ti. Tichuan, tun hi kan lo thleng ta...a la reilo thlathum vel awrh chauh a ni, mahse Pathian remruat hi chu a lo mak khawp mai.

LAWMTHU SAWINA:

Vawiina kan fate Inneihna min lawmpui tura lo kal zawng zawngte chungah lawmthu kan sawi mawlh mawlh e.

Khualluna Pautu leh Hrangchhungi te nupa
&
R. Zohmingthanga leh Tlangkhumi te nupa

HARD TALK ON THE SPOT

Kawngka chu Pu Laikunga chuan an kik karh karh a, “Lo lut ru” tia nula aw ngaihnobei, zawi thawp sat, a contralto aw dam diai mai hian min lo chhawn takah chuan kan phur lutuk chu kan zuang lut tawk tawk nghallo chauh a ni.
NGKHU : (Kawngka a inhnawh luh tup tup pahin) Kan chakkhai phuhru turin i kam chhuak tlem kan mamawh dawn a, a remlohna a awm em?
Zo-i : ( A lo nui sen sen a, engmah dang sawi ta lo chuan a la phiar lai chu a dah lawka, an chhuat laiah chuan ‘Huna’ tih hi a kezungpui chuan a han thai bial pap a, a rawn meng chhuak siar siar a) Kei leh ka chhung te hian he thu ah hian a remlohna sawi tur engmah kan hre lo (te a lo ti nghal ang zawt zawt a, mahse a uang lo...a heh no sen tak chu an pet fuap fuap a, a nui sen sen a, a puan bih an sawi chhing te te a, a mawngbawr khaltha tak mai chu an malis vel a)
NGKHU : ( Kan zam deuh tlat, ngam leh ngam lo hian kan zinga pakhat chuan aw lai rut chung hian) Biangbiakna kan nei dawn che a, hei hi kan zawhna hmasaber chu a ni. Are you ready ? (a lu a lo bu nghat nghat a) Zawhna Pakhatna Sub No1. (a) na - Huna i tana a chet hero na min han hrilh teh?
Zo-i : Ngawi lawk teh u, thingpui kan lum phawt ang e (Chutia a tih zawh chuan Choka lam pan chuan a kal phei a, Room lama a hla play ‘He na na- Maggie’ vuak rem chuan lam titih hian a tum phei vel alh alh a)
Short Break : Thingpui kan inlawk
NGKHU : Leeee
Zo-i : ( A sen tan tan a, a hmui a phut hlurh hlurh a, a tuibur hmuam lai chu tukverah chuan an pik chhuak puat a) Ka sawi zak viau a sin mawle...a hun leh ni te kha aw.... ( a mittui a tla dawn ta mai...) Bial Zaipawl hla kan zir haw lam hi kan kawmthlang lawk ah hian misual lian pui pui (tunhnua an sawi kan hriat chhawn leh dan chuan Moist helho zing a mi ni ngei a hriat an ni) pasarih, hmuihmul buk chhem chhum, mitmu lian pui pui te chuan min sual tumin an Vai Hockey Stick ngei mai chuan min rawn rikrap vak mai a, ka hlau lutuk a...!! Awi ka ngaihtuah chhuah apiang hian ka thau ah min man tlat. Ka au vak vak a, ( Heta a au hi an Kawmthlangpa sawi dan chuan auh bik nei a ang em a, kan pawh ngam lo a ni a ti ve tlat) min pui tu ka hmu mai si lo. Chutih lai tak chuan kawngchhak lam atang hian A ni chu a lo lang ta, a thinrim viau ni tur a ni a tawng te chu a chher chhuai chhuai a, tichuan an in fight ta a, ka hriat thiam dan ber chuan a thim deuh na a, Master Lee a style kha a hmang nasa deuh berin ka hria. Second 7 pawh a tling hman lovang, a ri fur fur a, a ri chawrh chawrh a, a tek chhuai chhuai ni berin ka hria...Bruce Lee film te pawh kha a ang hle in ka hria...misualho na tuar chu an te vawng vawng a, an zuang suau suau a...awi!!! en pawh ka en tha ngam lo...ka han hawi chhuah leh meuh chuan misual ho chu a lo thal vek tawh a, a hau a ‘e mera larki he...mera pyar he....tum misual lutuk karta hai...fly away’ a tia an thlawk bo ta a. Awi !! Aw!! kha mi zana ka lawm zia kha aw !! Ka tlan phei a..min lo pawm a, ka tap vak vak a. (Chutia a sawi lai chuan kan lo nui haks a) Nui su...ka zak ve tho a nia (Lehlam a hawi hmaks a, an zawhte raipuar lai chu a va chhiatkhum vak ringawt a) In sual...thil ni lo lo min zawt..i duh tawk tawh ang u. (Kan nui tlang ta ham ham a)

Golden chance:

A hun leh ni sawi lo ila, kan spy in Huna leh Zo-i te an inhel lai (Golden chance) a nan fuh tuma a mobile-a a lo record ruk chu hetiang hi a ni.(In duh heuh heuh tak an ni. KTP-a inhmang nasa dun tih takah an biahthu pawh un talh talh tak a ni).
HUNA: Hawh teh,ka duh tak, ramah chhuak ila,
Thingtlang khuaahte i riak teh ang.
(A tawng zo chiah tih chuan a scooter chu a’n kick nunga)
ZO-I: ( A bihrukna khiang kung kar atang chuan).
Huna..aw..Huna..nang nen chuan..
(A hnuk a ulh ta mai)
Ngai teh..i mawi e..ka duhtak,a ni,lungtiawi.
En teh,nipui a ral a,ruahtui a kangin a kiang ta si..Mahse..
HUNA: (Nui deuh sung chungin)
Aw ka thuva,lungpui kehkak kara mi,
Kham chhawrdawha awm,i hmel lah a nalh si,
I hmel min hmuh tir phawt mai teh.
(A tih zawh rual chuan an vawih tawt a).
ZO-I: Enge ni hei,meikhu ding ang thlaler ata lokal hi,
Murra leh Beraw rimtui nam rum rum,
Sumdawngtu Paudar tinreng rim chenin?
(Tiin hnar hup chungin a sawi a)
HUNA: (Aw a’n thian kharh kharh a)
Ngai teh, i mawi e,ka hmangaih,ngai teh,i mawi e,
I sam chu kel rual,Gilead tlang panga bawk ang ani.
I hate chu berampui rual hmul meh hlim,
I biang ten pawmgranet phel an iang e.
ZO-I: (A insum zo lo..a rawn chhuak ta..)
Aw..ka lalpa..sangsawm zinga a thasensiarpui,
I biangte chu hlo rimtui hmun,
I hmui te chu Lilypar ang,
I sakruangte chu saingho,sapphir-a chei ang a ni,
I kam a thlum ber mai e,duhawm famkim.
HUNA: (Zo-i chu a’n pawm thut a) Zo-i..Oh..Zote..
Hmeichhia alaia mawi ber,ka tanglaiah bei reng ang che..
Runtui a leh luan a,arpui meiin ban a chen hun pawh lo thlengse
Ka hmangaih reng ang che..

FAMILY BIO DATA:

Moneitu chhungkua :
1. Pu Khualluana Pautu (Pa ber)
2. Pi Hrangchhungi (Nu ber)
3. Pi Lawmnasangzuali w/o Biakthansanga Haulai, Kolkata
4. Lalhunruata
5. Pu Laltiamsanga h/o Hmangaihzuali, Lily Veng
6. Nl Laldintluangi, Lily Veng

Mo chhungkua :
1. Pu R.Zohmingthanga (Pa ber)
2. Pi Tlangkhumi (Nu ber)
3. Pi Chalthansangi w/o Vanlalhruaia, Chanmari ‘W’
4. Pu Zothansanga h/o Lalropuii, Hlimen
5. Zokailiani
6. Pu Zodingliana h/o Zodinliani, Hlimen

AN DIARY

(Kan Spy ten harsatna hrang hrang paltlangin a sur a sa hnuaiah an Diary ve ve ruk chhuahna hun an nei hlauh mai a, chhiartu duhtak i hriat chak awm deuh deuh te kan rawn tarlang e, a document pawh kan nei vek.)

24th December, 1999 (Huna) : “Aw khawnge lenrual hlui te kha..”

24th December, 1999 (Zo-i) : Zanin chu ar kan pui tur an vang dawn hle mai a, ka thian te lah chuan pasal min neih san sup sup tawh bawk si.

17th April, 2001 (Huna) : Ka pa hi chu ka kham tawh ngawt mai ‘ nupui nei rawh’ hi min ti leh ngawt thin a, neih tur lah chu ka la hmu mai si lo, ka hun tawh viau emaw ni chu le.

15th June, 2003 (Zo-i) : Engvang nge? Ka hrelo. KTP Member tam zawk hian U Zo min tih tak.

8th February, 2010 (Huna) : Khawnge kumin KTP General Conference chu tlangval hun chhunga a tawp nan tak tak kal kan tum ve leh ang e.

8th February, 2010 (Zo-i) : Bial Zaipawl zai dawn lo i la chu Conference hi chu ka kal tawh miah lo ang, a zahthlak tawh em mai.

4th March, 2010 (Huna) : A va han duh awm tak em, kha Hlimen nula kha, engtin nge a hming ka hriat theih ang aw..

4th March, 2010 (Zo-i) : Awi!! karei Lalpa leh!!! Conference ka lo kal lo ang tih ka hlau...kha tlangval ah khan engemaw chu a awm.

16th March, 2010 (Huna) : Leng ngam ang em..., ngam lo ang em...tumah lah hian engmah lah hi an hre silova.

16th March, 2010 (Zo-i) : He Hlimen tlang atang hian zawng ka di lenna tlang a lang thei nem maw...

17th March, 2010 (Huna) : Aw ka Juliet..aw ka Juliet...nang ngai reng reng hian maw thlafam ka chan dawn...

17th March, 2010 (Zo-i) : Signal a tha si lo, ka ning BSNL hmang ho tak hi chu, sms ringawt hi chu ka kham tawh.

9th April, 2010 (Huna) : Nizan kha chu aw...ka score ve thlawt a ni..an vawk note nei kan tlaivar pui zak mai a niah.

12th April, 2010 (Zo-i) : Suangtuahna leh duhthusam te hi a takin a thleng thei ang tih ka ring ngai lo a sin...mahse ka chan tur a Khuannu ruat a ni ngei ang.

23rd April, 2010 (Huna) : Ka dairy a bo daih ti a ka zawn ka zawn kha, Laldini Bookshelf ah a lo awm reng nia.

23th April, 2010 (Zo-i) : Ka dairy bo an hmuh thu Faka’n min hrilh chuan ka sa raps.

LAWMPUINA LEH DUHSAKNA

## Kan nghahpui thin Huna...nupui tha tak i neih hi kan lawm pui em em a che.
- I nghahpuite,
MCM Ek in Rs 5/- man
## Kan member Tv Huna nupui neih hi kan lawm hle - Scooter Driver Association (SDA)
## Kan thawhpui te inneih hi kan lawm hle
- Lighter & Pheikhawk Uih Rehna Zuar Union (LPURZU)
## Zo-i, pasal tha tak i hmuh avangin kan lawmpui a che. - Hlimen to Kulikawn Taxi Passenger Association (HKTPA)
## Hetiang reng renga lawmna leh hlimna i thlen tak bik avang hian Zo-i kan lawmpui a che.
- Vawk Kah Rai Neitu Union (VKRNU)
## Huna, Vanapa Hall a Defendor Jacket vaivira hu hu kan tih lai ni te kha kan ngaihtuahin a va lunglen thlak em..i nupui neih hi kan lawmpui tak zet a che
- Vanapa Hall Dancer Association (VHDA)

Article :

“Ka hawi vel a, engkim mai hian ka lung mi len” tiin chu tlangval chu an leihkapuia thuthluang duai chuang chuan aw tham tieu hian a lo zai a, a ngaihtuahna zawng zawng chuan kha mi ni a Pu Hrangate lova an feh tuma an haw kawng nawmzia hlir mai kha a suangtuah let a. Khawvelah hian tu dang nge awm chuang ang? A lunglen leh lawmna tawmpui zo tur hi. Rengchal hram vawng vawngte chuan a boruak chu an chawi nung ngei e.
Chutihlai tak mai chuan thler leh lamah chuan awka vin zet mai hian ‘I duh leh chhuak la a ni mai a lawm’ tih leh rik thuai thawm hi a lo awm a, chumi thawm an reh deuh hnu chuan naute chu a tap bai bai a, nu ber chuan ‘Ka chhuak em em ang, bawiha i pa bula awm nge in duh ka bulah thlang fel nghal rawh u, i pa hi ka chhuahsan dawn’ tiin a fa u ber hnenah chuan a lo hrilh mek a. Naupang ho lah chuan duh thlan tur an hrethiam mai si lo, an nu hnena kal chu an duh rualin an kal chuan an pa chuan a vau ang tih an hlau si... tah mai loh chu tih tur an nei ta lo. Pa ber lah chu Keipui koham inhrosa ang mai hian a rum chhur chhur tawh mai si a. Nu ber chuan a te ber chu an paw lawp a, ‘Ti khan in duh duhin awm rawh u’ tih pah chuan a bag chu a chuh a.
Aw...!! tiang reng hian em ni nupa nun chu lo ni ta a? An thler lehlama Vallunglenga dinhmn ang tho kha chu hmanah chuan an chan thin chu a ni ngei mai. Mahse tunah chuan a lo dang zo ta. An inngaihzawn lai hun hlimawm thinziate kha aw!! ‘Duh leh duat tak maia an inkuah vawng vawng laite kha chuan si-ar pawh lak an huam a nih kha mawl le.’ Hun leh kumte lo veiin an induhna chuan inneih an lo titlu ta a, chu ngei chu a ni vawiin a hetianga an awm chhan chu lo ni ta.
Inneihna hi a va chakawmin a lo va harsa tak em!! Vawikhat ngaihtuahna hian mihringte hi min lo va han kaihruai nasa tak em!! Kan duh tawh chuan kan duh bur mai a ni si a, a hnuah enge lo awm leh dawn tih kan dawn duhlo der tlat si...thutiam neih hi a ropui e..mahse thutiam hlen loh avanga inthenna lo awm ta hi sawi tur a va tam ta em !!! Inneihna hi thil na mai a ni lo...Lunglen tuar zawh loh mai avanga lo thleng thei a nihna hian ngaihtuah nasat a ngaihzia min hriattir e.

Huna’s expenditure :

Lily Veng atanga Hlimen tleitir chhai nan Huna’n a tha leh zung, sum leh pai a senso te kan hriat thei ang chin chin kan han tarlang ang e -
1. Petrol - Lily Veng to Hlimen 20 kms. (up & down), Nitin vawi hnih (day & night) kal ziah ang a chhut a ni. KTP Gen. Conference atanga nimin thleng khan 5420 kms. a tlan a. Petrol 271 litre a hmang a, Petrol 1litre = Rs. 48/- a chhutin Rs. 13008/- a hmang ral hman a ni.

2. Mobile bill - Mobile phone hi an CK-na ber a ni a, nitin vawi 10-15 vel hi an inbiak dan a ni a, an inbiak apiang hian minute 15 sermon pate thlakna tham an hmang ziah a, thlatin bill-ah Rs 8321.47 vel seng thin a ni a, tun thleng chuan Rs 36999.99 vel seng tawh anga chhut a ni.

3. Zo-i kamram : Nula naupang tak ni lo mahse hmawmsawm hi a duh ve hle a, hairep (tul 1999), Sangam (pack 1215), Superman a ek (tum 970), Burma plywood (phek 3860), Sachin (hlam 367), Babutea hnapkhir (khir 300000approx.), pass pass (fang 667854), pim pom (pom 600), Borai (rai 4578) te hi an lo in leisak tawh a ni.

NGKHU :

NGKHU lam pum hi kan Bulletin chhuah hmasak ber tum atang khan hriat chak in min zawt huai huai thin a, kan member nupui nei hnuhnung ber in Biak In hawnga nupui a neih chuan kan puang chhuak ang kan ti a, kan puang e...he Bulletin-ah hian zeh a ni...a hrechhuak hmasaber chuan rang takin Pu Huna hnenah in report vat tur a ni, lawmman chhe te tak tak kan siam ve a nia. Tin, NGKHU hi kan member zawng zawng in nupui kan neih takah chuan a hming pawh CHKHU tiin kan thlak ta e.

Mirillo te awka :
## Fa engzat pawh neiin tuchhuan engzat pawh nei ila, ka thlah te hmingah chuan LAIKUNGA tih kher hi chu an pu lovang. - Pu RT-a (Hlawh neia inkhawm thin)

## Hetianga a tangkai dawn a nih chuan KTP Gen. Conference-ah hian kal char char tawh ang.
- Tv. U Marina

Miril ve tep te awka :
## U Vel, vawiin a kan thil tawn hian beidawnna khur atangin min hruai chhuak se..beiseina thar nen kan tum ram chu thleng turin hawh u.. i in pen parh thar leh teh ang u.
- Maruatkimi ( Lal Tiger-i)

## Miin i tawng tuam tuam min ti a, Huna pawh hi thu a sawi tak tak chuan a tawng fiah lo ve telh telh tho asin - C.Puia

## Farnu hralh ai chuan Ar sualhuai hralh a hlawk zawk a nih hi. - Zo-i U.

Miril tak tak te awka :
## Nupui pasal i neih hmain zau takin i mit meng la, i neih hnuah erawh chuan a chanve chauhin meng ang che - Benjamin Franklin

PHOTO GALLERY:

He thingkung a Ar zo zai hi.... Zo-i chhawm tur atan chuan a duhawm ber mai awm e.

Khawi lamtluang nge i zawh dawn U Zo?

An pahnih a an inkawmna hmun ber a nih hi.

Huna chhar vek an nih hi.

Interview hi kan ti tak tak a nia aw !!

Ngaihzawngneih Kawnga Hmalatu Union

Bethel 20/06/2010

SERMON

KRISTIAN CHHUNGKUA LEH A PAWIMAWHNA

- Lalrosanga Kawlni

Tunlai chu Kristian chhungkaw beihpui thlak lai a ni bawk a Kristian chhungkua leh a pawimawhna tih thupuiah lo neih ve leh thung tawh ila a tha awm e. Kristian chhungkua tih han lam rik mai pawh hian nu thenkhat, pa thenkhat te chu kan ner deuh nghal mai niin a lang, a chhan pawh kum tin kristian chhungkaw Campaign nei in tha leh zung kan lo sen tawh thin vang a ni. Mahse zep thu cheng suh, kan beih nasat ang hu hi chuan rah hmuh tur erawh a awm lo thung. Kristian chhungkaw tehna, Chhung inkhawm, Buhfaitham, Pathian ram thilpek, etc. ah lah hmasawn chu sawi loh kan hniam tual tual mai niin a lang zawk si.Eng vang nge ni ta ang le ?

Kristian chhungkaw tobul tak tak chu Piantharna hi a ni. Kristian chhungkaw tak tak din tur chuan chhungkua a pianthar a ngai. Chu chu kristian chhung tobul tur dik tak a ni. Tuna kan vei em em, a tehna a tana kan hman, Chhung inkhawm, Buhfaitham leh thil dangte hi chu Kristian chhungkaw in a Rah chhuah tur chauh a ni. Rah zawng hmasa lo hian tuh/phun leh chawm len lam hi uar phawt ila tichuan chhiar sen loh rah kan hmuchhuak ngei ang. Tuh/Phun si lova rah zawng ngawt kan nih chuan kan beidawnna zakhua chu a la thui khawp ang. Tin, piang lo rah tir kan tum leh piang lo a tanga rah kan zawng chiam mai hian Piangsual a hring teuh thei bawk. Pianna dik atang chuan rah tha, chhungkua leh khawtlang, ram thleng pawha hlimna thlen thei a lo par chhuak thin.

‘Mihringin zirna sikul a dai hmasak ber chu chhungkua a ni’ an ti thin. Kan pian chhuahna chhungkua a zira mimal nun danglam theih zia hi thil chik mite chuan an hrechiang hle. Chhungkaw pakhata seilian te zia chu engkimah in ang diak diak lo mahse a inhnaih tlang hle thin. Mimal zia kan hriat chian chiah loh pawhin an chhungkaw zia atangin rin dan tlangpui kan nei thei mai thin a. Dik pawh a dik thawkhat viau thin. Unau chhul khat kual pawh an tet te atangin chhungkaw ze in ang lo tak takah dah hrangin sei lian ta sela, an lo puitlin chuan an kimtlang tih loh, an mimal nun ziaah chuan an in ang lo nasa thei hle dawn a ni. Mimal nunze chhiat leh thatah chhungkuain mawh a phur lian hle tihna a ni.

Chuti anih chuan kan rama suahsualna chi tinreng, hmun leh hmuna hmuh leh hriat tur a lo pun chhoh zel nachhan pawh hi sual hremna nat tawk loh vang emaw, vengtu sipai (police) te inthlahdah vang emaw a ni ngawt lovang. A chhan bul ber ni ngeia lang chu ; nun kawng dik leh ze tha zir chhuahna tlak chhungkua kan ramin a tlak chham vang a ni zawk ang. Hmasawnna kawng hrang hrangah sangin lian tual tual mahila, nun tobul leh innghahna chhungkua kan ngaihthah a, kan than san si chuan kan hmasawn dan chu a khingbaiin, rah tha lo a chhuah tel zel dawn niin a lang.
Nu leh pate pawh kan in enfiah a tul ta khawp mai, khawvel lo thang zelah hian chhungkua hian a mawhphurhna a hloh tial tial a. Chhungkaw hnapui, fanau te nun chherthat hna pawh chu chhungkaw pawn lama tih turah kan ngai zo ta. Nu leh pa te’n an fate zirna chu zirtirtute kutah kan dah pumhlum a, kan fanau te sakhaw nun kawng sial sak hna te pawh chu kohhran kutah kan dah hmiah mai a, kan duh tawk hle niin a lang . . . Hengte hian khawvela chhungkaw pawimawhna dik tak chu min hliah hneh ta hle. Sikul te, kohhran te, sorkar te hi chhungkaw thawhpuitu tangkai tak chu an ni thei ngei mai a. Mahse, a ai zawng an awh zo teuh lo tih hi i chiang thar leh ang u.

Murdock-a chuan “Chhungkaw tih makmawh chu thil pakhat chauh a ni a, chhungkuaa mihring lo piang mihring tih tlak ni tura buatsaih hi a ni,” a ti tawp mai thung. Dr Chafin-a ve thung chuan, “Chhungkua chu mihring than chhohna tur atana boruak tha leh tul awmna tura Pathianin a buatsaih a ni,” a ti leh bawk. Tichuan mihring nun chherna ‘pum’ tha ber chu zirna sikul tha ber ber leh Boarding tha tak tak te, Biak In leh Tan In (Jail) lian pui pui te ni lovin, chhungkua ngei hi a lo ni. Chhungkua atanga din fuh loh mihring chu hmun danga siam that leh a harsa thin hle a ni.

Chhungkua a hlawhchham chuan hnam leh sorkar a hlawhtling khawchhuak thei ngai lovang a. Chhungkaw tha, hrisel leh hlim siam nana hmanraw tha chu khawtlang nun siamthatna hmanraw tha a ni lo thei lo.Kenneth Chafin-a chuan “Khawtlang anga harsatna kan tawh reng reng, chhungkuaa zung a kaih dan thlir tel lova siam that kan tum chuan kan ti fuh ngai hauh lovang” a ti a, dik hmel viau a ni.

Khawtlanga mi pawimawha kan ngaih chi hrang hrang – Politician te, Sumdawngho te, leh Sakhaw hruaitute chenin chhungkaw ngaihthah chungin hlawhtlinna tak tak a awm thei lovang. Hnam anga kan nunhona chhiat leh that chu chhungkaw nunin a hril a. Sumdawngtute pawhin chhungkuaa kan mamawh leh duh zawngte thlirin hna an thawh a ngai bawk a. Chuti ang zelin, sakhuana kawngah pawh chhungkuaa sakhaw nun in zirtirna kan ngaihthah chuan kohhran nung leh tha a ding tak tak thei ngai lovang tih a chiang. Chutichuan, chhungkua chu mihringte nunhona te ber anga lang, mahse, nunhona pawl lian zawkte nghawng nasa thei ber a ni kan ti thei ang.

Kan khawtlang nun lo tla chhe mekah hian vantlang taka siamthatna hna thawh hian awmzia a nei thui lo viau thin a. A chhan chu a tobul tak chhungkua atanga beihna a nasat tawkloh vang niin a lang. Ram leh hnam nun kal kawi mek veitute leh sakhuana kawnga Mizote nun khalh ngil duha rawngbawltute hian siamthat hna thawka lungrual taka hma kan lakho theihna hmun leh tul ber chu chhungkaw siamthat hna hi a ni ang.

Heti taka pawimawh a ni chung hian kan ramah chhungkaw nun hruaina lam hi sorkar leh kohhran pawh hian kan ngaihsak tawk lo hlein ka hre thin. Rescue Centre te, Remand Home te, Tan In lian leh tha tak tak te kan nei a. Heng te hi chu chhungkua a hlawhchham hnua ‘bei nge sei run dung’ tia beihna hmun a ni ber a. Chutih laiin a bul atanga siamthatna hmanrua ni thei tur, Family Education Centre emaw Marriage & Family Therapy Centre emaw Youth Centre puitling deuh te pawh kan ramah hmuh tur a awm meuh lo tlat. Zoramah hian mihring nun a chhiat tawh hnua enkawlna ringawt kan buaipui chuan hetianga enkawl ngai hi kan pung tual tual dawn niin a lang. A venhimna lama hmalakna, chhungkaw enkawlna leh zirtirna lam kan hlamchhiah chuan khawtlang nun him leh hrisel kan nei thei ngai chuang kher lovang. Ram leh hnam himna zawnga kan then kan then mek lai hian chhungkaw nun leh mawhphurhna lam a him loh chuan kan hnam hi a him dam tak tak lovang tih hi a rinawm a ni. Kohhran angin Thlarauah harh tharin ri bung bung fo thin mahila kan thlarauna te hian chhungkuaah zung a kaiha, bu a khuar loh chuan chatuan daih nun leh harhna kan hmu chhuak hlei thei mawlh lo chu niin a lang.Chuvangin, ram leh kohhran thatna tura mimal leh khawtlang nun vei tu zawng zawng te chuan a tobul chhungkua atangin i thawk tan mawlh ang u.

EDITORIAL

Kohhran sual laka a koh hrante Inpui...

Pathianin ringtute awmkhawmna turin Kohhran a din a. Chutianga Amah ringtute In pui ni tura din anih avang tak chuan Thlarau thianghlimin Kohhran chu a vawng reng a ni tih hi Pathian thu min hrilh dan a ni. Thlarau Thianghlim hnathawh a lo thlen pawh hian ‘an awmkhawm a pawl’ tih a ni deuh zel.
Mi tam tak chuan ‘Kohhran chu sual laka a kohhran hi an ni mai’ an ti thin a.A dik hle. Amaherawhchu Sual laka koh hranna maiah hian Pathianin Kohhran a din chhan hi a la kim hauh lo. Kohhran chu Nihna leh Mawhphurhna (Duty) nei kawpin Pathianin a din tih hi hriat hmaih chi a ni lo. Kohhran nihna chu Sual laka lak hran a ni ngei mai, Sual laka inlak hranna leh koh hranna maiah hian Pathian hian min dah leh duh tawk mai hi a tum hauh lova, sual laka lak hran leh koh hran ringtu awmkhawm Kohhrante chungah chuan mawhphurhna tam tak a nghat zui a ni.
Kohhran kohvah chuan Pathianin mawhphurhna tam tak - Chanchin Tha puandarh hnate, Ringtu enkawl hnate, Amah fak leh chawimawi tura mawhphurhnate, Amah be ho thin tura mawhpurhnate, Thilpek rawngbawlna enkawl hnate, Serh leh sang tam tak khawih tura mawhphurhnate etc. a nghat a. Kan Lal Isua khawvelah a lo kal khan sual laka koh hran kan nih theih nan a tihtur a ti zova, A rawngbawl hna chhunzawm zel mawhphurhna chu ring tawk takin, ‘an lo thawk hauh lo mai palh anga’ ti hauh lovin Kohhran kovah a nghat zui ta hmiah mai a ni. Chu mawhphurhna chu Kohhran chuan a chhunzawm chuan chhun zawmin a awm a nga, a chhunzawm loh chuan chhunzawm lohin a awm mai dawn niin a lang.
Chuvangin ringtute Sual laka koh hran kan nih hian kan Inpui Kohhran min din sakah hian awmkhawma, chu rawngbawl hna chu chhunzawm tur kan ni tih hi hriat reng tur a ni. Mahni tlat tlata tla a, duh tawk mai tur a ni lovang. Ringtu tangkai tak leh Pathian hman theih ni turin Kristan a thisena a din Kohhranah Pathian aw kan ngai chang tur ni awm tak a ni.

ARTICLE

MEMBER THLENG PHAK RAWNGBAWLNA

- Z Khiangte

Engtin nge member hlate kan hnuhhnaih theih ang? Engatinge kan thalaipuite Kohhran activities hrang hrangaah hian an inthlahrun tlat thin? Thalaite zingah hian telve chakna an lo nei lo a ni zawk lo maw! Lo ni ta se eng vang nge ni ang? Engtin nge ni ang? A chhan leh vang sawi tur tam tak a awm thei awm e. Ka lo tawn ve tawh leh ka hriat chin huang chhung atang hian ka thiam ang tawkin tlem a zawng kan thai lang ve teh ang.
Group night-te kan hmang thin a, member tlawhchhuahna hunte pawh kan nei thin a, kan hlawkpui thin khawp mai! Mahse i duhtawk mai lovang u. Ni tina kan veivahnaahte hian tihtur kan va ngah tak em! Kohhran leh thalai inkhawm zanahte hian kal paha han hmuh mai theih, kan thalaipuite kawng sir remchang laia lo thute pawh kan hmuh fo thin ka ring. Engemaw thil tul dang avanga kan veivahnaahte pawh an khawlai lengte kan hmuh fo thin a. Kan en liamin kan kal pel mai thin em? Rim dang nam deuha min lo biakte hian, a rul tawk leka chhangin kan tlanchhiatsan mai thin em? Kan lo hel mai thin a nih chuan i sim hmak ang u. Chutiang mi kan thalaipuite aia fel leh tha inti a, ‘rui mai mai leh awm tha duh lo’ tih rilru kan put chuan keimahni ah Setana mizia bak hmuhtur an nei lovang. Chutiang anih chuan an rilru kan tina in thalaite zinga telve chaklohna hial thinlung an pui thei tih hi keini an thatlaipui KTP active member-te hian i hre thar leh ang u. Chuvangin ka thalaipuite leh kan hruaitute u, heng kawngah hian tan ila lehzual ang u. Hawihhawm tak, zahawm tak, zuamawm si loh nelawm si a, kan awmthiam te pawh a tha awm e. Kan thalai pui sual bawiha tang mekte hian kawng dik an zawh leh theihna tur chuan an zinga tel a ngai anih pawhin i tel hreh lovang u. Member hla kan tihte hian Kohhran leh thalai a rawngbawltute thlarauva kan dinhmun hi kan mizia leh kan tawngkam hman danahte hian kan hriat loh lai in min hrechiang duh viau a nia. Chuvangin sual in a phuarbeh mekte zalen nan theihtawp chhuah ila, Samari mitha rilru pua tanpui duhna thinlung nen kan rawngbawl hna hi i chhunzawm zel ang u.

PROGRAMME: Ni 21.06.2010(Mon) hi member inkhawmkim zan a ni a, member zawng zawngte kim taka inkhawm tur a ni. Thusawi leh Item hmuhnawm leh ngaihthlak nawm tak tak a awm ang. Nl Malsawmtluangi, Mizo Idol Top 5 2009, Dawrpui Vengthar, zaithiam tak a lo kal dawn.
Hemi zan hi member zawng zawngte’n kan nikhat hmawmsawm leh duh zawng ei ai Pathian hnena hlanna remchangah hman a ni ang a. Biak Inah ‘AI THAWH’ bawm hun a ni ang.

NEUH NEUH

A Thupekte chu a khirh si lova
Mihringte hi mahni thlekna lam leh duhzawngah chauh thuawih tum mi kan ni a. Chutiang kawng zawh mi, Kristian intite chu Kristian suak an ni. Kristian dik takte chuan Pathian Thupek dik takte chu a nuam emaw a hrehawm emaw pawh nise a vaiin an zawm zel thin.

TI ROPUI
Josefa Group te’n Hollow Guitar Stand tha tak leh changkang tak (fold theih) Branch K.T.P - ah an hlan. Josepha Group-te hian a ti ropui takzet a ni.
KTP Group hrang hrangte an fakawmin, an thawk ropui thin hle.

LEI LEH VAN A RAL ANG A, KA THU ERAWH CHU A RAL LOVANG
Kaisara lalna ram chu a ral ta a, Rome sipai rualte chu vaivutah an chang zo ta, Napolean-a sipai rual, sapram lam tinghingtute pawh an riral ta, Pharo-a chhuan thilte chu a tluchhe tawh a, thlan lungzum lian pui pui (Pyramid) an dinte chu thlaler leiah nitin a pil tual tual a. Tura chu sangha mantute len phona lungpui a ni ta a, Sidon lahin lungpui pakhat pawh a hnutchhiah ta lo. Mahse Pathian Thu chu a la ding zel. Tihboral tumna thil zawng zawng chuan an tanpui hlauh a, mihring thil hlun siamte chu a ral thuai thin a, Pathianin Thu a sawite chu a ding reng thin tih hi nitin a lang chiang tulh tulh a. Pipu thurochhiah dante chuan phum bo an tum tawh a, a ngai thei lotute’n tihboral tumin fawhkai tam an hal tam. Juda Iskariot-a tam takin fawpin an mantir tawh a, Peter-a tam takin chhechham meuhin an phat tawh bawk. Dema tam takin an thlahthlam a, Pathian Thu chu a ding reng si a ni.

Bethel 27/06/2010

SERMON

PATHIAN BEISEI RAWH

- C.Lalnuntluanga

“Aw ka nunna, engah nge i kun reng? Engah nge ka chhungah hian i buai ni? Pathian beisei rawh: a hmela damna avangin. Amah chu ka la fak dawn si a.” Sam 42:5

Mihringte nun hruaitu leh tihlimtu ber chu beiseina hi a ni ti ila kan tisual awm love. Kan dam chhan kan nuna thil hlu tak leh pawimawh tak a ni kan ti thei awm e. Chutih rual chuan beisei tur nei tawh lote chu mi vanduai tawp an ni thin. Khawvela mi khawngaih thlak ber leh hlauhawm ber chu mi beidawng, beisei tur nei tawh lova in hria te an ni an ti thin. Beisei a bo tawh chuan pawisak engmah a awm tawh lova, rukruk, tualthah leh mahni nun ngei pawh lak a hnai thin a ni.Kan beisei chu engpawh a ni thei e, khawvel mi chuan tisa thil (khawvel thil) ah chauh beiseina sang tak an neih avangin chu chuan a nun a khalh kal thin. Nimahsela, ringtute beiseina chu he khawvel thil ral leh mai tur, nghet lo leh tlo lo ang mai mai hi ni lovin, thirchakaiin lawng nghet taka a thlung ang hian kan beisei chu Pathian engkimtitheia inthlung nghet tlat a ni thung. (Hebrai 6:18-20)

Ringtute’n beiseina kan tih chu heti hian han sawifiah ila, Pathianin kan hma lama a tih tur nghakhlel taka lo thlir hi a ni a, chu chu a fapa Isua thihna leh thawhlehna avanga mi zawng zawng tan Pathianin min saim sak chu a ni (I Pet 1:1-3).

Ringtute beiseina chuan chhelna leh tumruhna a siam thin: I Thes 1:1-3 thu kan chhiar chuan, Thessalonika khuaa ringtu hmasa awm te chuan Isua Kristaa ‘beiseina’ an neih tlat avang chuan tihduhdahna leh tuarna hmunah pawh Pathian tan theihpatawpin, thahnemngai tak leh chhel takin Pathian tan an thawk tlat thin thu kan hmu a, chumi avang chuan Tirkoh Paula ngei pawh a lawm hle a, Pathian hnenah lawmthu a sawi hial reng a ni.

Pathian/Lal Isua hnung kan zuina kawngah hian hrehawmna hrang hrangte’n min nuai thin a, a chang chuan beidawn rum rumna hmunahte kan awm thin, hlawhchhamna (khawvel thilah) kan nunin a dai changte, hma lam hun thim tak ang te hian kan awm fo thin, tahna, rumna leh zan thimin min chim chang a awm fo thin. Nimahsela kan Pathian Thuah hetiang hian kan hmu “tahna ruam chu an zawhin tuihna awmnate a siam thin a ... chakna atangin chak lehzualna ah an kal thin, Zion-ah Pathian hmaah chuan an inlan theuh thin” (Sam 84:5-7)

Ringtute’n Pathian beiseina ruamah chuan tahna leh lungngaihna zan thim hnuaiah pawh chunglam Pathian awmna min thlir tir thin a, he khawvelah mikhual leh khualzin mai kan nih zawk avangin hrehawm mahse, harsa mahse chu beiseina nung kan neih tlat avang chuan chhelna, tumruhna leh thahnemngaihna min siamsak zawk thin a ni. Kan hmangaih leh duh tak kan then ni ah pawh kan Lalpa thihna leh thawhlehna avangin beiseina nung kan nei a, mittui karah pawh Lalpa fak theihna kan nei thin a ni.A va nihlawhthlak tak em!

Ringtute beiseina chuan damna famkim leh lawmna sawi hleih theih loh a siam thin:

Kan Pathian thu han tarlan Sam 42:5 ziak ah hian “ Aw ka nunna, engah nge i kun reng ? Engah nge ka chhungah hian i buai ni ? Pathian beisei rawh : a hmela damna avangin, Amah chu ka la fak dawn si a” tih kan hmu a. He Sam hi Davidan a fapa Absaloma a hlauh avanga a tlanchhiat laia, a nun baihvai lai leh khawhar laia a phuah chhuah niin a lang a. Davida nun khawhar leh tlanchhe reng renga nun hmang, beidawng tak chuan, a dinhmun chu hmelma laka tlawma, sal tang ang mai niin a inngaihtuaha, Israel-te hmelma laka ram hla taka sal tanga an awm laia Jerusalem a ngai vawng vawng ang mai khan. Jehova an Pathian awmna hmun bera an ngaih Jerusalem chu a ngai vawng vawng mai a. Sakhi luite tui chaka a thaw huam huam ang maiin chu Jerusalem Jehova khawpui chu a nun ram chau chuan a ngai ngawih ngawih mai a ni.

Chutia beidawng tak leh nun chau taka a awm lai chuan, Pathianah beiseina nung leh tanpuina a awmzia hre thar leh in “ Engah nge beidawng tak leh buai taka i awm reng ni !. Pathian beisei rawh, Amahah chuan damna leh beidawngte tana beiseina nung a awm a ni” tiin a au chhuak ta a ni.

Awle, unau duhtak, Lal Davida’n beidawnna chhah tak tawka a inhria ang hian keini pawh beidawnna chi hrang hrang in kan nun a nuaiin - Natna khirh tak kan chunga lo thleng avangte, Retheihna leh tlakchhamna lo thleng thin te hian, beidawnna khur thuk takah min chim pil mekin, hmalam beiseina eng nei tawh lo hialin kan inhria a ni thei e. Nimahsela, Lal Davidan a beidawn mangan laia Pathian hnena beiseina nung a awmzia hriaa, chu Pathian thu chuan a nun a chawikang thar leh ang hian, Eng ang dinhmun chhia leh chau taka ding pawh ni mah la, Pathianah chuan beiseina a awm a, min tanpui a inpeih reng tih hi i hre thar leh ang u. William Barclay-a chuan “Lal Isua khawngaihna leh Hmangaihna a awm chhung chuan, tumah hi mi beisei bo an awm lo a, Pathian thiltihtheihna a awm chhung chuan Beiseina awm lohna hmun reng khawvelah hian a awm lo” a lo ti thlawt a ni.

Heng a chunga kan sawi damchhung khawsak leh kan chunga lo thleng avanga beidawnna kan sawi mai piah lamah hian, Sual avanga beidawnna i chungah a thleng mek em? Nangma thil lo tih tawh avangtein beidawnna khurah i lut mekin, beiseina reng nei tawh lo leh kun ngawih ngawihin i nun a khawhar a ni thei e! Nimahsela, Lal Isua thihna leh thawhlehna avang chuan Pathianah chuan beisei tur leh chanvo i la nei reng tih in theihnghilh suh ang che. “ A ni chuan a khawngaihna nasa tak ang zelin, mithi zing ata Isua Krista thawhlehna avangin beiseina nung hmu turin min hring leh a, rochan chhe thei lo, bawlhhlawh kai lo, chuai thei lo, vana in tana khek chu hmuhna turin” I Pet I:3,4 a tih ang hian, mi zawng zawng tan englai pawhin Pathian hnenah beisei tur rochan chhe thei lo kan nei tih i hre thar leh ang u.

Pathian beisei a nghak tlat tute chuan a hmela damna famkim chu an chang thin a, chu chuan harsatna ruamah pawh lawm sawi hleih theih loh, tui nung lui chu an nunah lo thlengin, a lo luang chhuak thin a ni. Lalpan malsawm rawh se.

Editorial

Bukna dik ...

Thufingte 11:1 ah chuan “ Bukna dik lo hi LALPA mithmuhin thil tenawm a ni a.Khin dik tak erawh chu a lawm zawng a ni. ” tih kan hmu.
Bukna han tih hian kan rilruah Bazara alu, sa leh thil chi hrang hrang kan lei dawn a, dawrkaiin kan thil lei tur min lo buk sakna hi kan ngaihtuah deuh ber thin. Kawng khatah chuan dik pawh a dik reng e. Kan thil lei leh hralhah pawh a dikin kan ti tur a ni. Kan pawisa pek leh kan thil lei a inbuk tawk loh chuan a rilru nat thlak em em a, a dik lo a ni.
Tin, bukna han tih hian heti zawng pawh hian han hmang ta ila a huam tho awm e. Mitin mai hian keimahni bukna kan nei theuh mai, chu chu englai pawhin kan keng reng a, kan duh hun hunah kan khai mai thin. Lehlamah mahni thatna lai ber kan daha, lehlamah midangte that lohna ni a kan hriatte dahin, kan han khai ta thin a, kan rit ta nalh mai thin niin a lang.
Kohhrana rawngbawltute kan duhthusama an tlin bik lohna leh an famkim bik lohna nia kan hriatte leh kan thatna lai ve berte sawm khawmin, keimahni ‘PATLA’ ah kan khai thin em ? Chutiang buknaah chuan midangte buk tlin a harsa thin, mahni kan rit nalh zel. “Bukna diklo kan hman thin avang hian Kohhran ngei pawh hmuh sual a awl thin a, mi tam tak chuan Kristan a Thisena a din Kohhran ngei pawh an sawi chhiat phah bawrh bawrh thin reng niin a lang.” Chuvangin Bukna dik hmang turin Pathian thuin min hrilh a ni.
Kohhran a mi chi hrang hrangte hi mite aia tha leh fel an ni bik vek hauh lo. Mahni pawh tling lo inti a, in sit ve ngawih ngawih, Pathian thatna nun zir zel leh hmasawn zel turte an ni ve tho mai. Chubakah mi heti zozai zingah chuan Piangthar lo nia kan hriat pawh an awm mai thei. Hmanlai Pharisaite khan buh lem leh buh tak thliar hran nghal mai an duh lai khan, Isuan “ buh lem leh buh tak chu lo to za rih rawh se” a ti a ni.
“Mahni aiin midang tha zawkah ruat rawh u” tih hi bukna dik kan hman tur chu a ni mai a ngem?

Article

I CHHUT VE NGAI EM

- Alex Sanga

Kan Kristianna nun min pawlh daltute zinga pakhat chu kan thinlunga sap ngaihsan lutukna hi a ni awm e. Mingo tawh phawt hi ngaihtuah chiang mang hlei lovin, kan lo ngaisang em em ringawt a. Kan pathian biak lo chuah a nih tawh hi. Kan nulate lahin Delhi bawr vela sap vakvai pasalah an han nei a, an la intithei em em zawk lehnghal. Mizo hnam hming thlauhthlak duh hialna khawp an nei a, hnamah an chaing tawh si lo. Keini lahin, “A pasal chu sap a nia” an han tih tawh hi chuan kan en dan a sang nghal hle mai a. Amaherawh chu, vai pasala neite phei chu kan huat rawn lo chauh a nihmai hi zawng.
Mingo hote nena kan intawn chhan leh mingo hoin Mizote min awhbeh takna chhan khan Cachar phai a kan Pu Bengkhuaia ten an thingpui huan an tih buai fo avang leh chuta hnathawktute an thah, an rukbo vang a ni ber. Mingo hoten kan thatna tur an duh vangte, kan lo hawiharha, khawvel eng kan hmuhteihna tura min duhsak vang a ni lova. Buaina leh harsatna kan thlen sak fo avangin mi awpbeh a tul ta mai zawk a ni.
Tripura-a rawngbawl tum, Pu Buanga leh Sap upaten kawng an bo avangin Zoramah Pathian in a rawn tir lut a. Heng sap pahnihten thahnem ngai taka rawng min bawlsak avangin Sap kan ngaihsanna hi a zual phah ti ila kan sawi sual em lovang chu. Amaherawh chu mingo dangte erawh chuan zirna lama kan san lutukte, kan changkante kha an duhber lova. An sumdawnna tibuai lo tawk vela kan awm kha an duh ber zawk a ni. Amaherawh chu, mingo ho hi hua ila, i hmusit ang u, ka ti hauh lo. Mihring ve tho an ni a, keini ang bawka siamtuin angkhat thoa a siam, rilru, finna, thiltihtheihna a pek ve tho kan ni a. An nunna a chhe laite thlauh thla a, a tha lai te entawn hian a hnam ang pawh a kan damna a ni zawk a ni. Hei hian kan Kristianna kawnga kan mawhphurhna te a tha zawngin min herpui ngei ang.
Ghandhi-a kha a fakawm ka ti thin. Dan (Law) a zir laiin sap pachal ang nmih ve a tum a. a incheina pawh sap inchei ang in a inchei a. sap nunzia angin nun ve a tum a. Mahse sap hoin an en dan kha a danglam phah lo. India mi a nih chhung chuan sap ani thei dawn lo tih a inhmuhchhuah hnu meuh chuan a dingchhuak chiang hle a nih kha. Keini pawh Mizo kan ni a, pathianin min dahna Mizo kan nihna hi lawm taka pawm mai tur leh hnamdang tih dan entawn mai lova, zohnam tih dan anga kal hi a Kristian hle a ni.
Kan nunzia hi i tinghet ang u. Kan ngaihsan zawng hian kan nunzia a hril a nia. “Thutak in hria ang a, thutak chuan a ti zalen ang che u.” tih Amah ngeiin min hrilh a. “Engnge thutak chu” tia Pilata zawhna chu a chhanna Bible-ah kan hmu lo. Kei mahni hian chu thutak chu kan zawn a ngai fo reng a ni. I rilru i thlak loh chuan i danglam ngai lovang tih thufing a awm si a.

KTP HALF YEAR MEET, 2010 CHU CHALTLANG SOUTH KOHHRAN BIAK INAH NI 26.06.2010(SAT) ZAN DAR 7:00 LEH NI 27.06.2010(SUN) CHAWHNU DAR 1:30 ATANGA ZAN THLENGA NEIH A NI ANG.