Bethel 27/06/2010

SERMON

PATHIAN BEISEI RAWH

- C.Lalnuntluanga

“Aw ka nunna, engah nge i kun reng? Engah nge ka chhungah hian i buai ni? Pathian beisei rawh: a hmela damna avangin. Amah chu ka la fak dawn si a.” Sam 42:5

Mihringte nun hruaitu leh tihlimtu ber chu beiseina hi a ni ti ila kan tisual awm love. Kan dam chhan kan nuna thil hlu tak leh pawimawh tak a ni kan ti thei awm e. Chutih rual chuan beisei tur nei tawh lote chu mi vanduai tawp an ni thin. Khawvela mi khawngaih thlak ber leh hlauhawm ber chu mi beidawng, beisei tur nei tawh lova in hria te an ni an ti thin. Beisei a bo tawh chuan pawisak engmah a awm tawh lova, rukruk, tualthah leh mahni nun ngei pawh lak a hnai thin a ni.Kan beisei chu engpawh a ni thei e, khawvel mi chuan tisa thil (khawvel thil) ah chauh beiseina sang tak an neih avangin chu chuan a nun a khalh kal thin. Nimahsela, ringtute beiseina chu he khawvel thil ral leh mai tur, nghet lo leh tlo lo ang mai mai hi ni lovin, thirchakaiin lawng nghet taka a thlung ang hian kan beisei chu Pathian engkimtitheia inthlung nghet tlat a ni thung. (Hebrai 6:18-20)

Ringtute’n beiseina kan tih chu heti hian han sawifiah ila, Pathianin kan hma lama a tih tur nghakhlel taka lo thlir hi a ni a, chu chu a fapa Isua thihna leh thawhlehna avanga mi zawng zawng tan Pathianin min saim sak chu a ni (I Pet 1:1-3).

Ringtute beiseina chuan chhelna leh tumruhna a siam thin: I Thes 1:1-3 thu kan chhiar chuan, Thessalonika khuaa ringtu hmasa awm te chuan Isua Kristaa ‘beiseina’ an neih tlat avang chuan tihduhdahna leh tuarna hmunah pawh Pathian tan theihpatawpin, thahnemngai tak leh chhel takin Pathian tan an thawk tlat thin thu kan hmu a, chumi avang chuan Tirkoh Paula ngei pawh a lawm hle a, Pathian hnenah lawmthu a sawi hial reng a ni.

Pathian/Lal Isua hnung kan zuina kawngah hian hrehawmna hrang hrangte’n min nuai thin a, a chang chuan beidawn rum rumna hmunahte kan awm thin, hlawhchhamna (khawvel thilah) kan nunin a dai changte, hma lam hun thim tak ang te hian kan awm fo thin, tahna, rumna leh zan thimin min chim chang a awm fo thin. Nimahsela kan Pathian Thuah hetiang hian kan hmu “tahna ruam chu an zawhin tuihna awmnate a siam thin a ... chakna atangin chak lehzualna ah an kal thin, Zion-ah Pathian hmaah chuan an inlan theuh thin” (Sam 84:5-7)

Ringtute’n Pathian beiseina ruamah chuan tahna leh lungngaihna zan thim hnuaiah pawh chunglam Pathian awmna min thlir tir thin a, he khawvelah mikhual leh khualzin mai kan nih zawk avangin hrehawm mahse, harsa mahse chu beiseina nung kan neih tlat avang chuan chhelna, tumruhna leh thahnemngaihna min siamsak zawk thin a ni. Kan hmangaih leh duh tak kan then ni ah pawh kan Lalpa thihna leh thawhlehna avangin beiseina nung kan nei a, mittui karah pawh Lalpa fak theihna kan nei thin a ni.A va nihlawhthlak tak em!

Ringtute beiseina chuan damna famkim leh lawmna sawi hleih theih loh a siam thin:

Kan Pathian thu han tarlan Sam 42:5 ziak ah hian “ Aw ka nunna, engah nge i kun reng ? Engah nge ka chhungah hian i buai ni ? Pathian beisei rawh : a hmela damna avangin, Amah chu ka la fak dawn si a” tih kan hmu a. He Sam hi Davidan a fapa Absaloma a hlauh avanga a tlanchhiat laia, a nun baihvai lai leh khawhar laia a phuah chhuah niin a lang a. Davida nun khawhar leh tlanchhe reng renga nun hmang, beidawng tak chuan, a dinhmun chu hmelma laka tlawma, sal tang ang mai niin a inngaihtuaha, Israel-te hmelma laka ram hla taka sal tanga an awm laia Jerusalem a ngai vawng vawng ang mai khan. Jehova an Pathian awmna hmun bera an ngaih Jerusalem chu a ngai vawng vawng mai a. Sakhi luite tui chaka a thaw huam huam ang maiin chu Jerusalem Jehova khawpui chu a nun ram chau chuan a ngai ngawih ngawih mai a ni.

Chutia beidawng tak leh nun chau taka a awm lai chuan, Pathianah beiseina nung leh tanpuina a awmzia hre thar leh in “ Engah nge beidawng tak leh buai taka i awm reng ni !. Pathian beisei rawh, Amahah chuan damna leh beidawngte tana beiseina nung a awm a ni” tiin a au chhuak ta a ni.

Awle, unau duhtak, Lal Davida’n beidawnna chhah tak tawka a inhria ang hian keini pawh beidawnna chi hrang hrang in kan nun a nuaiin - Natna khirh tak kan chunga lo thleng avangte, Retheihna leh tlakchhamna lo thleng thin te hian, beidawnna khur thuk takah min chim pil mekin, hmalam beiseina eng nei tawh lo hialin kan inhria a ni thei e. Nimahsela, Lal Davidan a beidawn mangan laia Pathian hnena beiseina nung a awmzia hriaa, chu Pathian thu chuan a nun a chawikang thar leh ang hian, Eng ang dinhmun chhia leh chau taka ding pawh ni mah la, Pathianah chuan beiseina a awm a, min tanpui a inpeih reng tih hi i hre thar leh ang u. William Barclay-a chuan “Lal Isua khawngaihna leh Hmangaihna a awm chhung chuan, tumah hi mi beisei bo an awm lo a, Pathian thiltihtheihna a awm chhung chuan Beiseina awm lohna hmun reng khawvelah hian a awm lo” a lo ti thlawt a ni.

Heng a chunga kan sawi damchhung khawsak leh kan chunga lo thleng avanga beidawnna kan sawi mai piah lamah hian, Sual avanga beidawnna i chungah a thleng mek em? Nangma thil lo tih tawh avangtein beidawnna khurah i lut mekin, beiseina reng nei tawh lo leh kun ngawih ngawihin i nun a khawhar a ni thei e! Nimahsela, Lal Isua thihna leh thawhlehna avang chuan Pathianah chuan beisei tur leh chanvo i la nei reng tih in theihnghilh suh ang che. “ A ni chuan a khawngaihna nasa tak ang zelin, mithi zing ata Isua Krista thawhlehna avangin beiseina nung hmu turin min hring leh a, rochan chhe thei lo, bawlhhlawh kai lo, chuai thei lo, vana in tana khek chu hmuhna turin” I Pet I:3,4 a tih ang hian, mi zawng zawng tan englai pawhin Pathian hnenah beisei tur rochan chhe thei lo kan nei tih i hre thar leh ang u.

Pathian beisei a nghak tlat tute chuan a hmela damna famkim chu an chang thin a, chu chuan harsatna ruamah pawh lawm sawi hleih theih loh, tui nung lui chu an nunah lo thlengin, a lo luang chhuak thin a ni. Lalpan malsawm rawh se.

Editorial

Bukna dik ...

Thufingte 11:1 ah chuan “ Bukna dik lo hi LALPA mithmuhin thil tenawm a ni a.Khin dik tak erawh chu a lawm zawng a ni. ” tih kan hmu.
Bukna han tih hian kan rilruah Bazara alu, sa leh thil chi hrang hrang kan lei dawn a, dawrkaiin kan thil lei tur min lo buk sakna hi kan ngaihtuah deuh ber thin. Kawng khatah chuan dik pawh a dik reng e. Kan thil lei leh hralhah pawh a dikin kan ti tur a ni. Kan pawisa pek leh kan thil lei a inbuk tawk loh chuan a rilru nat thlak em em a, a dik lo a ni.
Tin, bukna han tih hian heti zawng pawh hian han hmang ta ila a huam tho awm e. Mitin mai hian keimahni bukna kan nei theuh mai, chu chu englai pawhin kan keng reng a, kan duh hun hunah kan khai mai thin. Lehlamah mahni thatna lai ber kan daha, lehlamah midangte that lohna ni a kan hriatte dahin, kan han khai ta thin a, kan rit ta nalh mai thin niin a lang.
Kohhrana rawngbawltute kan duhthusama an tlin bik lohna leh an famkim bik lohna nia kan hriatte leh kan thatna lai ve berte sawm khawmin, keimahni ‘PATLA’ ah kan khai thin em ? Chutiang buknaah chuan midangte buk tlin a harsa thin, mahni kan rit nalh zel. “Bukna diklo kan hman thin avang hian Kohhran ngei pawh hmuh sual a awl thin a, mi tam tak chuan Kristan a Thisena a din Kohhran ngei pawh an sawi chhiat phah bawrh bawrh thin reng niin a lang.” Chuvangin Bukna dik hmang turin Pathian thuin min hrilh a ni.
Kohhran a mi chi hrang hrangte hi mite aia tha leh fel an ni bik vek hauh lo. Mahni pawh tling lo inti a, in sit ve ngawih ngawih, Pathian thatna nun zir zel leh hmasawn zel turte an ni ve tho mai. Chubakah mi heti zozai zingah chuan Piangthar lo nia kan hriat pawh an awm mai thei. Hmanlai Pharisaite khan buh lem leh buh tak thliar hran nghal mai an duh lai khan, Isuan “ buh lem leh buh tak chu lo to za rih rawh se” a ti a ni.
“Mahni aiin midang tha zawkah ruat rawh u” tih hi bukna dik kan hman tur chu a ni mai a ngem?

Article

I CHHUT VE NGAI EM

- Alex Sanga

Kan Kristianna nun min pawlh daltute zinga pakhat chu kan thinlunga sap ngaihsan lutukna hi a ni awm e. Mingo tawh phawt hi ngaihtuah chiang mang hlei lovin, kan lo ngaisang em em ringawt a. Kan pathian biak lo chuah a nih tawh hi. Kan nulate lahin Delhi bawr vela sap vakvai pasalah an han nei a, an la intithei em em zawk lehnghal. Mizo hnam hming thlauhthlak duh hialna khawp an nei a, hnamah an chaing tawh si lo. Keini lahin, “A pasal chu sap a nia” an han tih tawh hi chuan kan en dan a sang nghal hle mai a. Amaherawh chu, vai pasala neite phei chu kan huat rawn lo chauh a nihmai hi zawng.
Mingo hote nena kan intawn chhan leh mingo hoin Mizote min awhbeh takna chhan khan Cachar phai a kan Pu Bengkhuaia ten an thingpui huan an tih buai fo avang leh chuta hnathawktute an thah, an rukbo vang a ni ber. Mingo hoten kan thatna tur an duh vangte, kan lo hawiharha, khawvel eng kan hmuhteihna tura min duhsak vang a ni lova. Buaina leh harsatna kan thlen sak fo avangin mi awpbeh a tul ta mai zawk a ni.
Tripura-a rawngbawl tum, Pu Buanga leh Sap upaten kawng an bo avangin Zoramah Pathian in a rawn tir lut a. Heng sap pahnihten thahnem ngai taka rawng min bawlsak avangin Sap kan ngaihsanna hi a zual phah ti ila kan sawi sual em lovang chu. Amaherawh chu mingo dangte erawh chuan zirna lama kan san lutukte, kan changkante kha an duhber lova. An sumdawnna tibuai lo tawk vela kan awm kha an duh ber zawk a ni. Amaherawh chu, mingo ho hi hua ila, i hmusit ang u, ka ti hauh lo. Mihring ve tho an ni a, keini ang bawka siamtuin angkhat thoa a siam, rilru, finna, thiltihtheihna a pek ve tho kan ni a. An nunna a chhe laite thlauh thla a, a tha lai te entawn hian a hnam ang pawh a kan damna a ni zawk a ni. Hei hian kan Kristianna kawnga kan mawhphurhna te a tha zawngin min herpui ngei ang.
Ghandhi-a kha a fakawm ka ti thin. Dan (Law) a zir laiin sap pachal ang nmih ve a tum a. a incheina pawh sap inchei ang in a inchei a. sap nunzia angin nun ve a tum a. Mahse sap hoin an en dan kha a danglam phah lo. India mi a nih chhung chuan sap ani thei dawn lo tih a inhmuhchhuah hnu meuh chuan a dingchhuak chiang hle a nih kha. Keini pawh Mizo kan ni a, pathianin min dahna Mizo kan nihna hi lawm taka pawm mai tur leh hnamdang tih dan entawn mai lova, zohnam tih dan anga kal hi a Kristian hle a ni.
Kan nunzia hi i tinghet ang u. Kan ngaihsan zawng hian kan nunzia a hril a nia. “Thutak in hria ang a, thutak chuan a ti zalen ang che u.” tih Amah ngeiin min hrilh a. “Engnge thutak chu” tia Pilata zawhna chu a chhanna Bible-ah kan hmu lo. Kei mahni hian chu thutak chu kan zawn a ngai fo reng a ni. I rilru i thlak loh chuan i danglam ngai lovang tih thufing a awm si a.

KTP HALF YEAR MEET, 2010 CHU CHALTLANG SOUTH KOHHRAN BIAK INAH NI 26.06.2010(SAT) ZAN DAR 7:00 LEH NI 27.06.2010(SUN) CHAWHNU DAR 1:30 ATANGA ZAN THLENGA NEIH A NI ANG.